تجربة مرسيدس CLS 350 (حصريا)

uae speed · 04:07 PM

السلام عليكم ..

Mercedes CLS 350

بدون مقدمات ندخل في الموضوع على طول ، وبحاول اختصر قدر الامكان وأعطيكم المعلومات المفيده والمهمه حول السيارة

التجربة كانت في وكالة قرقاش في دبي الساعه 4 العصر ، وما قدرت آخذ راحتي في التجربه
والتصوير وأخذ الملاحظات و ذلك بسبب الازدحام الشديد حول الوكاله و الجو الحار!
والسبب الاهم هو قيامي بتجربتين في وقت واحد ومدة قصيرة .

السيارة الاولى هي موضوعنا اليوم CLS 350 موديل 2007 .
السيارة الثانيه هي SL500 موديل 2007 انتظروا التجربة قريبا ً لا تفوتكم

هنا بداية التجربه ، متجهين الى السيارة .. اللي في الصوره هو مندوب الوكاله :

صور السيارة من الخارج :

طبعا السيارة تعتبر كوبيه رياضية بأربع أبواب ، وهي فئة جديده مبتكره من مرسيدس ..
شكلها رائع جدا ً وخصوصا الاسطابات الامامية .

من الداخل :

أولاً : لازم نتعرف على أهم مواصفات السيارة الأساسية والمحرك :

-المحرك : V6 حجمه 3.5 لتر والقوة 272 حصان والعزم 350 نيوتن.
-التسارع: 7 ثواني .
-السرعه القصوة : 250 كلم (محددة الكترونيا ً).
-استهلاك الوقود: 10.1 لتر لكل 100 كلم.
-ناقل الحركة : أوتوماتيكي 7G-TRONIC (سبع سرعات).
- مواصفات اخرى : نظام الفرامل المانع للانغلاق ABS .
- 8 مكبرات صوتية ، هوائي مدمج بزجاج المؤخرة.
-منظم السرعات TEMPOMAT مشتملا على محدد السرعة المتغير SPEEDTRONIC
-وسادات هوائية أمامية وجانبية ذات حجمي انتفاخ للسائق والركاب الأمامي وكذلك وسادات للنوافذ.

ثانيا ً : التجربه ، بقولها على شكل فقرات :

- أول ما ركبنا السيارة ، كانت مولعة من شدة الحرارة! والمندوب ما قصر شغل المكيف فل على طول
حتى ما افتكر يسخن الموتر!بس بصراحه المكيف بارد جدا ً ، وفيه قوة دفع ممتازة.

- قيادة السيارة سهلة جدا ً جدا ً ، تحس كأنك مسيطر عليها بشكل كامل ، وخصوصا ً عند اللفات
والتجاوز والنظر الى المرايات الجانبية.

- استجابة السيارة سريعه ، بدعسه بسيطه بتلقى الموتر يفز مره وحده ، وأيضا ً البريكات ممتازة .

- هدوء السيارة التام ! ما تسمع صوت المحرك وانت داخل الموتر ، وأيضا ً تتميز بالعزل الصوتي
اثناء القيادة بسرعات عاليه .

- ثباتها على المنحنيات ، تحس ان السيارة لاصقة في الشارع مع اني كنت ادخل اللفات بسرعه عاليه ( المندوب هني كان يقرا على عمره)

- تغييرات القير سلسه على جميع السرعات ، والتحكم فيه كان سهل.

ثالثا ً : وصلنا للتفاصيل المصوره :

صورت موتر ثاني نفس اللي جربته من داخل الوكاله ، الفرق الوحيد هو لون السيتات فقط

السيتات الامامية ، فيها مساحه مناسبه نوعا ما للأرجل .

أزرار النوافذ ، والتحكم بوضعيات المقعد + وجود ذاكرة Memory .

المساحه الخلفيه قد تكون ضيقه نوعا ً ما ، ولكنها تعتبر مساحه مقبوله نظرا ً لفئة السيارة الرياضية.

وجود مكيف خلفي مع التحكم .

تابع /

uae speed · 24-06-2007, 10:43 PM

أزرار النافذه و التحكم بكرسي الراكب الامامي مع وجود الذاكره أيضا ً .

تشغيل الاسطابات ، بالاضافة الى زر غسيل الانوار الاماميه ، واللي تحت يفك الهاند بريك.

العدادات الامامية ، على اليسار الساعه ، في الوسط عداد الكيلومترات ، على اليمين الـ RPM .
في أقصى اليمين مؤشر الحراره ، وفي أفصى اليسار مؤشر البترول .

مكيف منفصل للراكب والسائق مع امكانية التحكم بدرجات الحرارة وبوضعيات مختلفة.

تتوفر بشاشة ملاحة وخرائط لدول الخليج ، بالاضافة الى بلوتوث وهاتف داخلي .

ازرار التحكم بالهاتف والبلوتوث والـ ESP والايرباق وغيرها ..

تابع /

uae speed · 24-06-2007, 10:50 PM

القير يحتوي على زر تشغيل السيارة ، يتم تشغيل السيارة بالضغط على البريك أولا ً ثم الضغط على الزر مره واحده .

القير G-TRONIC من سبع سرعات .

وجود اماكن مخصصه للمشروبات .

صوره محرك السيارة بشكل عام .. 6 سلندر حجمه 3.5 لتر وبقوة 272 حصان.

الدبه الخلفيه :

سعر السيارة 324 الف درهم !!!
غالي جدا جدا للأسف .

واخيرا ً سلبيات وايجابيات عن الـ CLS 350 .

الايجابيات :

- سهولة القيادة والتحكم في وظائف السيارة.
- مواصفات وتكنولجيا متطوره بالاضافه الى المحرك الرائع.
- ثبات ممتاز جدا ً على المنحنيات .
- شكل رياضي متميز وفريد من نوعه و تعتبر أول سيارة كوبيه بأربع أبواب .
- تبريد فائق القوة مع ان الجو كان حار جدا ً !

السلبيات :

- السعر المبالغ فيه .
- المساحه الداخليه قد تكون ضيقه عند البعض.
- شكل المقود بايخ من وجهة نظري.

انتهى الموضوع ، ان شاء الله تكون التجربه مفيده لكم ..
واسمحولي اذا قصرت في الموضوع ، وان شاء الله التجارب القادمه تكون أفضل.

تحياتي لكم

الأنصاري · 24-06-2007, 11:15 PM

مشكور اخوي على التجربه الحلوه

بحكم انها سيارة احد اصدقائي ودوم فيها فاقدر اقول انها من ناحيه الشكل والثبات والهدوء ممتازه جدا جدا جدا

وفي كوالتي كبير في داخليه السياره واهتمام كبير في التفاصيل

وهاي اول مرسيدس اشوف ان مكيفها بارد فعلا

السلبيات
انها سياره مدينه فقط كراسيها مو مريحه ويابسه والسياره ضيقه من الداخل بشكل كبير يمكن لأنها سبورت وهاي اكبر عيب اشوفه انها مو مريحه خاصه حق سفر لو كان في شخص طويل او متين

وماتستحق اكثر من 200 الف ريال

AMG · 24-06-2007, 11:27 PM

مشكور الغالي على التجربة المتميزة وبالفعل السيارة غالية جدا وأعتقد انه هذي الأيام خف الطلب عليها

rfee3 el mestwa · 24-06-2007, 11:36 PM

اول شي أشكرك اخوي على التجربة هذي وماقصرت ومن منظوري انا مايسد عيني غير CLS63 AMG الصراحه موتر جميل فعلاً وسيتاته روعه روعه واحلى من CLS500 من ناحية الراحه و السعر انا اشوف سيارات مرسيدس كلها غالية و مستغرب من الأسعار يوم اروح وكالة قرقاس في الشارقة اكلم اللي في الشو روم يقولي الكوالتي عالي و كل شي غلا عندك الألومنيوم غلا الكروم غلا و الجلد المستخدم في مرسيدس يقولي عالي الجوده فعشان جي غالي ولاننسى إسم مرسيدس ...

NisFan · 24-06-2007, 11:49 PM

مشكووور على التجربة الحلوة
هل فيها تبريد ومساج للمقاعد الامامية؟

Bu_7maid · 25-06-2007, 12:07 AM

اول كمن صورة ماظهرو عندي ..

السعر ماتوقعته ..!!

324 الف

وايد غالي

توقعت تكون ب 280 او شوي اقل ..

ولكن تجربة حلوة

يعطيك العافية

بانتظار تجربتك الثانية ..

1100R · 25-06-2007, 12:27 AM

تسلم ..

تجربة رائعة..

ولو اني متحفظ على السعر غالي جدا..

الشبابي · 25-06-2007, 02:03 AM

تجربة رائعة اخوي UAE Speed ...
وجزاك الله الف خير على مجهودك الطيب ...
سؤال / ما لاحظت ان ارتفاع السقف قليل ؟؟ بالذات للمقاعد الخلفية ؟؟

اخوكم الشبابي