صور و مواصفات و اسعار متسوبيشي جالنت 2007

**بو علي** · 08-07-2007, 02:59 PM

وديت اليوم سيارتي الوكاله فحص ال 20 الف

و اتصلت بواحد من الربع ايي ياخذني

و انا اترياه دخلت الوكاله و صورت لكم متسوبيشي جالنت 2007

فئة فل جلد

عدد الصور 11 صوره بس

و ادري جودة الصور مب وايد قويه
لكن تمشي الحال

طبعا متسوبيشي جالنت نزل شكلها الجديد في 2006
و هي تنزل بفئة 4 سلندر 2.4 لتر تولد 170 حصان
بجير تبترونك مكون من 4 سرعات
للأسف لاحظت انهم موقفو يجيبون سيارة الماجنا القويه
و ما عندهم صالون 6 سلندر حاليا
و الظاهر بسبب قلة الطلب عليها بسبب جيرها الضعيف

مب هذا موضوعنا

تتوفر جالنت بسرع مناسب بالنسبه لفئتها
مع ان المفروض اتكون اقل شوي

يبدا سعرها من 60 الف لأقل فئه وصولا ل 83 الف للفل جلد

ملاحظه : كل المواصفات الي بكتبها الحين هي لفئة الفل

السياره تتوفر بمقاععد جلديه مع قابلية تعديل كرسي السائق كهربائيا

و ايضا النظام الصوتي فيها هو روك فورد و تتوز في السياره 8 سماعات اما الراديو فهو يعمل على
موجة FM\AM مع مشغل سي دي (6 سي دي جينجر)
يشغل MP3 فقط
لا يتوفر مشغل كاسيت في السياره
مكيف اوتوماتيك
عجلات المنيوم مقاس 16
للاسف مثبت السرعه خلف السكان و ليس ازرار في السكان
(المقود)
ايضا بالنسبه للايرباق فعدد الايرباج في السياره 6 ايرباج

و مثل ما قلت من قبل
محرك السياره ميفيك 2.4 لتر 4 سلندر 170 حصان
سرعته القصوى 200 كلم\سا
و التسارع في 11 ثانيه

السياره بصراحه حلو تصميمها و سعرها مقبول
لكن ارقام الاداء ما اعجبتني وايد
و ما فيها مشغل كاسيت

سعرها 83 الف درهم

الصور

**بو علي** · 08-07-2007, 03:02 PM

و هاذي صورة الفئه الاقل

و هاذي داخليته لكنها مب من تصويري

و بصراحه

الموظف الي في الوكاله قهرني

ربع ساعه احوط داخل ما فكر حتى ايي يقول تبغي مساعده؟

الموظف ربيعي مسافر و الله هو كان بس عاد شو بنقول

اتمنى ان الموضوع اعجبكم

و اتمنى ان جودة الصور مقبوله

**MKM** · 08-07-2007, 03:10 PM

الموضوع عجيب

وسياره حلوه , وسعرها مقبول

حركة الموظف مش حلوه بالمره

مشكور على الموضوع ياعسل

**grandv8** · 08-07-2007, 03:31 PM

السلام عليكم ورحمة الله وبركاته

ماشاء الله عليك اخوي وخبر حلو

مشكلة وكالة ميستوبيشي (الحبتور) خدمة المبيعات تعبانة جدا.

وحتى انه مايسون لك سالفة وحتى ماعندهم خلفية للسيارة.

في واحد من ربعنا اشترى باجيرو الشكل قبل الجديد ، واخبرهم متى بينزل الشكل الجديد ، وقال بعده مب الحين وبينزل اول 2007 ، واشترى السيارة وبعد شهر تقريبا نزل الشكل الجديد.

والحين رافع عليهم قضية بخصوص الكذب .

**AMG** · 08-07-2007, 03:44 PM

ما تسوى هذا السعر نهائيا والسيارة لا تتمتع بجمال منافساتها على الاقل

**بو علي** · 08-07-2007, 06:25 PM

كلامكم صحيح

الجالنت تحتاج بعض الاشياء علشان تصير احسن

ارقام الاداء ابدا ما اعجبتني
ما فيها كاسيت
لو الرنقات 17 احلى
لو حطو فيها جناح بتطلع احسن
كشافات
زنون

و كثير من الاشياء تحتاجها علشان تطلع احلى

انا اشوفها وايد ناقصه

و في رايي الاكورد كخيار افضل من الجالنت و الكامري

الكامري فل مخمل ب 88 الف ! ! !

بس اليوم في وكالة الهوندا قالي من الممكن ان الشكل الجديد ينزل في شهر 11

و بيكون اغلى