سعر الـ Nissan GT-R في المسعود للسيارات
السلام عليكم ورحمة الله وبركاته
اليوم كنت في وكالة المسعود للسيارات في أبوظبي ،، مريت عند أحد مندوبي المبيعات وسألته عن النيسان GT-R ،، قالي انه ما عنده فكرة متى بتوصل بس في سيارتين طلبهم أحد الشيوخ وبيوصلون قريب جدا
سألته عن السعر وقال ما يعرف ،، وراح يسأل مدير المعرض ،، مدير المعرض عطاه السعر ،، الحين تخيلوا الموقف يا اخوان لما اكون انا عارف سعر السيارة في أمريكا ومتوقع ان سعرنا يكون اكثر بس فرق السعر معقول نوعا ما ،، ويعطيني السعر واجده أكثر من سعرها في أمريكا بحوالي 65% !!!
سعر السيارة هو
430,000 درهم إماراتي
والله صدمت بشدة لما سمعت السعر ،،،، سعرها في أمريكا هو 70,000 دولار أمريكي ما يساوي تقريبا 260,000 درهم ،، فرق السعر بيننا وبين امريكا هو 170,000 درهم بالتمام والكمال ،، انا كنت اعرف ان سعرها في الخليج بيتجاوز سعرها في امريكا لكن اعتقد انه بيزيد عليه بـ 40 او 50 الف فقط ،، ما توقعت الفرق يوصل الى 170 الف .
الغريب اني يوم سألته ليش فرق السعر هذا ،، قالي عشان عندنا مواصفات اضافية ،، قلتله يعني ايش بتكون المواصفات الاضافية هذي ،، المحرك نفسه ،، الانظمة كلها هي نفسها ،، مجرد اضافات داخلية بسيطة وزدتوا السعر 170,000 درهم
طبعا رجع يتعذر بارتفاع الين والكلام الفارغ هذا وكأن الين يرتفع مقابل الدرهم فقط وينسى ان الدرهم مربوط بالدولار ،، يعني لو ارتفع الين مقابل الدرهم معناته انه ارتفع مقابل الدولار ايضا
سألته سؤال آخر وهو هل السعر هذا نهائي ولا مجرد سعر مبدئي لأن عدد السيارات محدود حاليا ،، قالي لا هذا نهائي وما يتوقع انه ينقص مستقبلا
شخصيا اتوقع انه راح ينقص كثير لاحقا ،، لكن اذا كانت الوكالة تلجئ لهذا الاسلوب الرخيص وتستغل ان العدد محدود وترفع الاسعار ،، وش خلوا لأصحاب المعارض ؟؟؟؟!!!!!!
السعر هذا ( 430,000 درهم ) ممكن اشتري به نيسان GT-R من امريكا + أرمادا ( سيارة رياضية + سيارة أخرى للعائلة )
الي يفكر يشتري السيارة الأفضل انه يجيبها من أمريكا لأنه مهما صار ما راح تكلفه صيانة السيارة لـ 5 سنوات قادمة مبلغ 170,000 درهم وراح يطلع كسبان في النهاية
أتمنى من جميع الاخوان في الإمارات ودول الخليج يحاولون يجيبون اسعارها من الوكالات عشان نقدر نقارن بين وكيل ابوظبي والوكلاء الآخرين مع اني اتوقع شخصيا ان الاسعار تكون متقاربة بشدة
__________________
|
اذا السياره مش موجوده لا في المعرض ولا في الميناء ولا في الطريق الى البلاد,من وين جاب هالسعر اصلا؟؟ شكلهم في الوكاله مب عارفين اصلا شو السياره الي سألتهم عنها
العرض العادي
