>



صفحة 1 من 9 123456789 الأخيرةالأخيرة
النتائج 1 إلى 6 من 51
  1. #1
    الصورة الرمزية EL_3grab
    EL_3grab غير متصل عضو فعّال جداً
    تاريخ التسجيل
    Jun 2006
    الدولة
    23
    المشاركات
    1,808

    Talking محبوبتي والتوربو .. ملحمة ميكانيكية ..


    السلام عليكم ورحمة الله وبركاته

    عساكم طيبين .. دووم إن شاء الله

    تم بحمدالله وفضله تركيب تيربو كت كامل شامل .. وهاي أعتبرها أكبر خطوه بحياتي :D .. معدل الخطورة كان جدا" عالي بالقيج .. بس الحمدالله توكلنا على الله .. والنتيجة عسل .. الحمدالله

    هي جتني كفرصة وغتمنتها .. بصراحة فرصة ما تتفوت وجاية من الله وفحزتها ..

    بداية من 2005 وقبل ما أفكر آخذ السيارة .. كنت حاط فيبالي شي واحد .. "القابيلة للتعديل" .. "أحسن منصة للتعديل" .. يمين يسار .. ماشي مثل الجولف .. تعديلها موجود من أحسن الشركات العالمية .. وكانت متطورة عن اللي بالسوق .. نظام FSI .. والـDSG .. وبالأخير كانت أحسن سيارة لعدد من السنين عالتوالي ..

    دووم يوم تييك المكينة ولا السيارة فيها أنظمة جديدة .. يكون التعديل عليها صعب ومكلف للشركات اللي بتسوي المنتج .. وأشوف هاذي مزتها .. ما ينفع تسير وتشتري من حيالله شركة وتعال ركب .. وهذا كان واضح أول ما طاحت هالمكينة .. يا كثر السوالف اللي نزلت وأثبتت فشلها ..

    فيوم أنته بآخر الدنيا عن أي وكيل للشركة ولا خدمة للزبون .. إختيارك لازم يكون فيه محله .. وتدعي أنه ما يصير إلا الخير في كل مراحل العملية .. أي خطأ بسيط ولو تافه جدا .. يكلفك أقل شي سبوع ..

    السالفة

    وأنا أدور بالمنتديات وأحوط بالمواقع أشوف شو الخيارات المتوفرة للتوربو كت .. أحترت بين 3 شركات .. APR .. VF .. ATP ..

    APR

    كان أغلاهم وبفرق كبييير .. بس هم الوحيديين اللي كتهم كامل كلش .. أشتر وركب .. ما تحتاج أي شي ثاني .. وجودة منتجاتهم فوووق .. الصراحة بعد ماشفت القطع .. ما تتقارن مع أي شركة ثانية .. وهم الوحيديين اللي يستخدمون قطع تصنع عندهم .. مافي إستعانه بأي شركة ثانية ..

    VF Engineering

    الكت اللي عندهم يمشي الحال .. بس في كمن شي ما كان عاجبني .. الفيول بمب من شركة ثانية .. والبرمجة من شركة ثالثة ..

    ATP

    هذا أرخص كت .. بس بعد كان يحتاج لقطع كثيرة علشان يستوي كامل .. يعني تقريبا بتعامل مع 4-5 شركات غيرهم علشان أكمل الأغراض .. مني مناك وبعد الحساب والشحن لكل القطع .. ما طلع ذاك الرخص ..


    بيني وبينكم .. كت APR تقريبا كان أختياري الثالث .. كنت على بعد خطوتين من طلبي لكت الـATP .. بس نفس ما قلتلكم جت من الله ..

    وأنا أحوط بمنتدى vwvortex .. شركة نزلت إعلان لبيع كت الـAPR .. وبسعر منخفض .. وكاتبين راسلنا علشان تعرف كم منخفض .. من فضولي طرشت لهم مسج .. وقلتلهم بكم تبوونه .. وما شفتوه ويهي بعد ما قريت السعر أخس عن هذا >>

    1400$ دولار مطيحين من السعر .. وسمعت لبنانية تقول بمخي .. "يــــااااي مش مــعقــول" ..

    هالرمسة الساعة 8 بالليل .. الساعة 12:20 أنا مطرش البيزات كاملة (الله يخلي الأنصاري كانوا فاتحين لين 12:30 الصبح)

    وفرت1400$ .. ولا تقريبا 2200$ دولار لو باخذ الفيول بمب والأنتركولر بروحهم عقب .. بالتالي .. أستوى أحسن كت موجود .. وأرخص عنهم كلهم .. (أحسن وأرخص .. ما يجوون بجملة وحدة .. إلا فالحالات الخارقة للطبيعية الجونجرية)

    ليش يا بن الحلال جه رخيص .. سؤالي للشركة؟؟ .. الكت صارلة سنه مطيح عندهم ومحد شراه .. ويبون يفضون مخزنهم باسرع وقت .. الحمدالله أني كنت أول واحد راد على الموضوع وقلتلهم شاري الكت بعد خمس دقايق من نزل الموضوع .. والله لو ترييت أكثر لنباع لواحد غيري ..


    ---------------------


    وتحت حملة makeyourfastfaster .. واللي ما يعرف منو هو FAST .. هو الأرنب المتوحش اللي نزل مع حملة VW الأمريكيه عند أطلاق الـGTI بأمريكا .. (سو سيرج عن VW FAST وبتفهم أكثر )

    طرحت APR هذا الكت .. واللي هو أول كت توربو يتوفر للسيارة ..





    ---------------------







    APR StageIII 2.0TFSI



    مثل ما تشوفون الكت كاامل .. كل برغي وواشر موجودين .. ما يبالك الا العدة وتعال ركب ..

    وهاذي صور لبعض أهم القطع :-


    الصفصوف .. على الصوت اللي يطلعه :D .. التوربو من شركة Garret .. من فئه الـGT وأسمه GT2871R .. ويقدر على فوق 400 حصان ببوست بين 25-30 مع برمجة حلوة





    المانفوولد .. ومسواي من الأنكونيل .. معدن يستحمل الحرارة لدرجات عالية ويقاوم الحلاى .. باقي الشركات تستخدم منفولد ستييل ..





    وهذا الكوع .. من التوربو للقزوز .. ومن الأنكونيل بعد ..





    الأنتركولر .. (مب جنه عندي واحد ) تقدرون تقولون ياي ببلاش .. الحلو اللي فيه أنه يركب مكان أنتركولر الوكالة .. حجمه دبل الوكالة .. وأقدر أركبه مع اللي عندي .. يعني أنتركولريين كباار .. محد سواها ..





    الفيول بمب .. وهي تقريبا أهم قطعه بالمكينة ككل .. هاذي مب فيول بمب عادية .. هاذي فيول بمب الضغط العالي .. تدفع البترول للأنجكترات بضغط يوصل 130 بار .. أو psi 1886 .. هالضغط كله علشان نظام البخ دايركت لحجرة الأحتراق (FSI) .. وفي فيول بمب ثانيه أم ضغط منخفظ 40 psi .. توصل البترول من التانكي لبمب الضغط العالي ..وهاذي بعد لازم تتبدل





    الأنجكترات .. هالأنجكترات ما تنباع وما أيوون ألا مع الكت .. وهي الوحيدة اللي أثبتت دعمها لقوة توصل فوق 600 حصان .. هاذي أنجكترات Audi S3 ومعدلة من الداخلة بأنها تسمح بتدفق البترول بسعة أكبر ..





    MAF Housing .. هذا حجمه أكبر عن مال الوكالة بالضعف .. يسمح بمرور كمية أكبر للهوى للقرائة .. هوى زيادة + بترول أكثر = قوة أكثر ..





    البلو أوف .. وهذا اللي يطلع صوت العطسه .. عاد عندي ألكتروني .. ويرجع الهوى للسيارة .. ما يتفه برع للجو .. فالصوت أقل بوايد ..





    وأخيرا الأنتيك .. مثل ما تشوفونه دلع .. كربون فايبر .. بس للاسف ما أقدر أستخدم الكربون .. بتيكم السالفة عقب




    وباقي الكت فيه البيبات والبراغي والجازكت .. وكل اللي تباه .. تشوفونهم بالصورة الأولى ..


    ---------------------


    التركيب

    إخترت أحسن وقت للتركيب ألا وهو إجازة العيد اللي يت سبوعين على حظنا .. الكمبيوتر كان لازم يتطرش علشان يتبرمج .. وأذا شليته السيارة بتم واقفه مكانها لين ما يرجع .. ثانيا .. لازم أظمن أنه الكمبيوتر يوصل عندهم قبل لا أبدي وأفجج المكينة .. لا سمح الله وصار شي فجمارك أمريكا و ما وصل الشركة .. يرجعلي وأنا مبطل نص المكينة .. ما ينفع .. فحطيت ببالي من أول ما يوصل .. أبدي أجلع من السيارة .. ومن يرجعلي .. جد خلصت التركيب .. تعال ركب الكمبيوتر وشغل السيارة .. يعني Plug&Play ..

    يوم وصلني الكت .. كانوا في مشكلتين .. الأولى .. كتيب تركيب التوربو ما كان موجود بالكت .. ثانيا .. كانوا عندي مسمارين معوايين بسبب الشحن الخايس .. واحد بالتوربو والثاني بالمنفولد .. (ما أعرف منو ألوم .. أرامكس .. ولا الشركة اللي طرشته لبريدي الأمريكي ) .. المسمارين كانوا خابقين الكرتون وظاهرين منه .. يعني كنت أقدر أشوفهم قبل لا أستلم الطرد


    اللي بالتوربو




    اللي بالمنفولد




    مشكلة بسيطه وتنحل .. للأسف لا .. يوم كامل بالصناعية أدور البديل .. حصلت .. ورجعت البيت .. اللي بالمنفولد كان أطول من اللازم ويضرب بالتوربو .. وكان بجودة سيئه يوم جلعته .. مساراته أنمسحت .. ما قدرت أثق فييه وخصه أنه بمكان حساس فيه ضغط وحرارة عاليين !!

    البديل اللي بالتوربو كان أقصر من الازم .. فما كنت أقدر أتيت عدل .. آخر شي قلت مالي ألا الشركة نفسها أطلبه منهم وبأسرع وقت وقبل لا تيي إجازة العيد وحزة التركيب .. والحمدالله .. الله يسرها المسامير والكتيب وصلوا وبدلتهم ..

    هاي هي الأغراض المطلوبة علشان تقدر تركب الكت بروحك وفالبيت .. والحمدالله حصلتهم كلهم

    أغلبهم كانوا عندي .. سيره وحدة لصناعية الشارجة و ACE خلصت كل شي ..


    T-25 Torx screwdriver
    T-30 Torx screwdriver
    T-45 Torx screwdriver

    7 mm nut driver

    4 mm combination wrench
    10 mm combination wrench
    13 mm combination wrench
    16 mm combination wrench
    17 mm combination wrench
    18 mm combination wrench
    22 mm combination wrench
    24 mm combination wrench


    T-30 Torx ¼” drive socket


    ¼” drive ratchet
    ¼” drive extension – 12” long

    3/8” drive ratchet
    3/8” drive extension – 1 ½” long


    5 mm Allen head socket 3/8” drive
    6 mm Allen head socket 3/8” drive
    8 mm Allen head socket 3/8” drive


    4 mm ¼” drive deep socket
    10 mm ¼” drive deep socket


    12 mm 3/8” drive deep socket
    13 mm 3/8” drive deep socket
    15 mm 3/8” drive socket
    16 mm 3/8” drive socket
    18 mm 3/8” drive socket
    21 mm 3/8” drive socket
    24 mm 3/8” drive socket
    27 mm 3/8” drive socket

    M5 triple square socket
    M8 triple square socket
    M10 triple square 3/8” drive socket (4” long shaft)
    M12 triple square 3/8” drive short socket


    Diagonal cut off pliers
    3-tone Jake
    3-tone stand (x2)
    Feeler Gauge
    Locking pliers, small (x2)



    Oil
    Coolant
    Anti-Seize (High Temp.)
    Thread locker (Medium strength)
    Molly grease (High quality)
    WD-40


    أول شي سويته بعد ما وصلت المسامير والكتيب هو جمعت التوربو مبدئيا بوقت فراغي وقبل موعد التركيب وتطريش الكمبيوتر ..





    مثل ما تشوفون .. التوربو متصل بالمنفولد من الأعلى .. وبالكوع من الجانب .. شكله غاوي ولذيذ



    وطافت السنون و الأيام والساعات وجت ساعة الصفر .. نوقف السيارة أبديا ولمدة سبوعين .. (خيرتي قلصت السيارة برع وداخل الكراج :D .. يسلمو سيفوه) .. وهذا الجمبتوتر قبل لا يطرش




    المفروض أطرش ورقه مع الكمبيوتر بالكرتون .. فيها معلوماتي ومعلومات السيارة .. نزين ماشي حبر فالطباعة .. وكنت خايف بعد الورقة تظيع يمين ولا يسار ويبرمجولي السيارة بشي ثاني .. ماشي غير أكتب عكفر الكمبيوتر نفسه بماركر ما يمسحه إلا التنر .. :D (الصورة تشوفونها عقب)


    ---------------------


    من عرفت أنه الكمبيوتر وصل الشركة سالم .. قلصت السيارة مره ثانيه للقراج علشان أبدي أشتغل عليها

    والصراحة ستانست يوم شفت السيارة بهاي الحالة ..







    واقفه على ثلاث ستاندات .. وإن دل .. دل على صلابة البدي والقيرمن أنجنييرينج ..

    قبل لا أبدي .. نزلت الآيل والكولانت .. وشليت كفر المكينة والأنتيك والبتري من السيارة .. تشوفونهم بالزاوية فالصورة الأخيره

  2. #2
    الصورة الرمزية EL_3grab
    EL_3grab غير متصل عضو فعّال جداً
    تاريخ التسجيل
    Jun 2006
    الدولة
    23
    المشاركات
    1,808

    افتراضي

    ---------------------

    في ثلاث مراحل مهمه حطيتها للشغل:

    الأولى .. تركيب الأنجكترات والفيول بمب
    الثانية .. تركيب الأنتركولر والأنتهاء من واجهة السيارة ومقدمه المكينه ككل
    الثالثة .. تركيب التوربو وتوصيل الكمبيوتر وتشغيل السيارة


    ---------------------


    بسم الله

    المرحلة الأولى

    تركيب الأنجكترات والفيول بمب ..ويا كثر البراغي اللي لازم تفجها .. أذا ما كان عندك نظام معين .. بتضيع وبتخربط ثلاثترباعهم .. فأي برغي أجلعه أحطه بجيس مال السندويجات وأكتب عليه من وين جاناا ..





    البمبر والأنتركولر الأولي جلعناهم .. الكمبيوتر أقرى منه بعض التعليمات اللي بتفيدني .. المسامير تحت مجيسه .. دبات مسافي فيهم ماي المشاشات .. غميضه أجبه .. فيهم صابوون .. ودبه الصابون بـ5 :D






    واجهه السيارة وفيها الليتات (سوود العيون كباار ) .. هالواجهه هي عبارة عن هيكل داعم يشل الراديتر وأنتركولر الوكالة ..






    مقدمة المكينة بدون الواجهه .. لو تشوفون تحت .. مساند الراديتر والباقي على ثلاجة cooler ..






    جلعت الأنتيك والثروتل بدي وفيول بمب الضغط العالي ..






    الأنجكترات علشان أبدلهم .. بو رووس زرق






    وهذا يسمونه الـCam Lobe للفيول بمب .. هو اللي يضغط على الفيول بمب علشان تولد الضغط العالي .. متصل بكام السيارة .. وشغلته شبيه بالكام يوم يدووس ويفتح الفالفات .. ومثل ما تشوفون هوو في حاله ممتازه .. لأنه في بعض الحالات يهتري وبالتالي الفيول بمب ما تولد الضغط اللازم علشان تدز بترول أكثر للسيارة ويصير عندك فيول كت ..






    الفيول بمب مع الأنتيك .. جلعتهم مع بعض .. الفيول بمب متصل بالـFuel Rail عن طريق بيبات معدن .. علشان الضغط العالي .. فهالمرحلة بدلت الفيول بمب .. مع اللي جت بالكت وتعتبر اقوى بكثير وتقدر تدعم لـ600 حصان وفوق ..






    هاذي كل العده .. مافي شي غريب أو فانسي








    الأنجكترات لا بركه فيهم ..عذبوني لين ما جلعتهم يديه وارمه 3 أيام .. ما ستغربت يوم شفت كل هالرمل والوصخ .. والله شي عجييب غريب






    نظفت الفتحات من الحلط .. كشخه لو شي طاح بالمكينه .. مادري شو بييبه ..






    الأنجكترات البديلة راكبين ..








    من مساوىء نظام الـFSI .. الآيل يتجمع على الفالفات ويحترق ويكون طبقه .. وتزيد كل ما زاد مشي السيارة .. هذا شكلهم وسيارتي ماشيه 53 ألف .. في مرحلة قادمة المكينة لازم تتطبل وتتنظف .. بنستغل هالفرصه يوم بتي .. وبنغير البساتن والرودات حق أب جريد مستقبلي ..








    الأنتيك والفيول بمب والثروتل بدي راكبين .. وكذه نكون خالصين من المرحلة الأولى .. وصراحة .. هيه أصعب مرحلة .. الله سلم



    ---------------------



    المرحلة الثانية

    تركيب الأنتركولر والأنتهاء من واجهة السيارة ومقدمه المكينه ككل ..

    مرحلة سهلة وشغل يوم واحد





    أنتركولر الوكالة جلعناه






    الأنتركولر اليديد .. وشوفوه عرضه وقارنوا






    الأنتر راكب ..








    الواجهه راكبه مع الأنتر كولر الثاني .. وخلصنا من المرحلة الثانية ..



    ---------------------



    المرحلة الثالثة

    أجلع توربو الوكالة .. وأركب الصفصف اليديد .. مافي يمين ولا يسار .. أجلع .. وركب ..

    بس أول شي لازم أخلص تجميع التوربو ..





    منصه عمل .. وردية .. نظيفه .. وفيها ABCD.. شو تبون أكثر .. :D






    التوربو مستوي مثل الأخطبوط .. هاذي بيبات الكولانت والأيل للتوربو .. وتشوفون البلو اوف الألكتروني .. وفي قطعه سودة الموجودة بالصورة اللي قبل .. هاذي اللي تتحكم بالبوست .. ومتصله بالواسجيت ..







    نرجع للسيارة علشان نجلع توربو الوكالة .. جلعنا التاير علشان نجلع الأكسل اليمين وننزل التوربو .. هالبرغي العود الحليان اللي بنص البريك .. إستخدامه مره وحده فقط .. ما تقتدر ترد تستخدمه بعد ما تجلعه .. لازم واحد يديد .. ولا بيبطل عمره بروحه .. وما تشوف عمرك إلا يالس تمشي على البريك






    الأكسل مجلوع مخلوع مبطل مفجوج .. تشوفون هالمخده اللي تحت .. الوالده تسأل ليش مخده قاصره من طقم الصاله .. :D

    عااد الحين يبدي الأنسداح تحت السيارة والدعاء أنه ما تطيح فوق راسك






    أول شي الأقزوز أنجلع من التوربو والسيارة ..






    توروب الوكالة قبل الطلاق .. وتشوفون بيبات الكولانت والآيل اللي لازم أجلعها قبل ..








    التوربو برع .. ومفصوخ من كل السوالف اللي كانت عليه ..






    الكمبيوتر .. وتشوفون الكتابه عليه :D .. للأسف وصل قبل لا أركب التوربو .. .. مطرشنه للي كنت أتعامل وياها .. أسمها كورتني أيرلند .. سناها من سنايي .. بدونهاا جان إنجلبت الدنيا فوق حدر .. كفت ووفت الصراحة .. خدمة للزبون فووق الممتازه ..






    الكمبيوتر راكب بمحله .. تحت كفر المشاشات .. كيس الكمبيوتر مقاوم للصدمات .. حتى يوم كنت بشحنه .. قالولي مب لازم تلفه وايد .. تقدر تتطرشه بظرف .. عااد غنوم لففه بالنفافييخ .. وحطيته بكرتون كله بوووه قبل لا أطرشه .. وستكرات "قابل للكسر" دوور مداير الكرتون .. :D






    وهذا صورة التوربو راكب .. طبعا ما تشوفون شي لأني ركب الأكسل قبل لا أصورة :D






    المكينة خالصة وكل شي راكب فيها .. طبعا أحين يبالي قزوز (داون بايب) يديد ..

  3. #3
    الصورة الرمزية EL_3grab
    EL_3grab غير متصل عضو فعّال جداً
    تاريخ التسجيل
    Jun 2006
    الدولة
    23
    المشاركات
    1,808

    افتراضي

    ---------------------



    يكرم المرء أو يهان .. حزة تشغيل المكينة :D





    قبل لا أشغل السيارة ومن بعد ما شبكت البطارية .. وصلت الابتوب بكمبيوتر السيارة .. ومسحت كل الكودات الموجودة فيه ..

    بندت السيارة .. لأنه كانت تحتاج عصير زيادة .. (كولانت) ..



    ---------------------


    بعد ما شغلنا السيارة وتأكد كل شي تمام ..كان قاصرني الداون بايب .. وعلى هالأساس حجزت موعد مع فوكس دبي يسويلي داون بايب .. وهاي أكبر غلطه سويتها فحياتي .. يقولون لي غالي وحرامي .. عاد مب جه ..

    والله العظيم الداون بايب طوله متر .. ما فيه ولا حيسه .. سيده من أول لآخره .. كم تتوقعون قالي .. 1800 درهم .. حتى قبل لا يرفع السيارة ويشوفها من تحت .. عنه .. الصرقه عيني عينك .. أنا طلبت داون بايب من AWE جان تذكرون .. من أمريكا ومع الشحن ما كلفني 2300 درهم .. وهاذي شركة عالمية وعلى أصول ..

    طلعت السيارة من كراجهم وأنا أضحك .. وسقتها لييين صناعية الشارجه بحشرتها وعلى شارع الشيخ زايد .. 300 درهم عند الخوانيج والشغله ما خذت ساعتين ورجعت البيت ..

    لا بركه فيهم من كراج .. مب متغمض الا على بيزات الركفري .. :D


    ---------------------


    الأختبارات

    في جهاز خاص بسيايير الـVAG .. يسمونه VAG-Com وهو جهاز توصله بكمبيوتر السيارة عن طريج الابتوب وتكشف عليها من فوق لتحت .. تقرى الكود .. تغير من خصايص السيارة .. تقرى كل السنسرات اللي بالسيارة وتسجلهم والكثير الكثير :D

    بهالمرحلة يهمنا كمن شي .. البوست .. ضغط البترول .. الهوى .. نسبه الهوى للبترول .. الدتتشن .. المس فاير .. التايمنج .. وغيرهم ..

    بجهاز الـVag-com .. أقدر أسجل هالسوالف .. وعقب أحطهم على برنامج الأكسل وأتفحص وأشوف جان كل شي تمام ..







    الرسم البياني الأول .. وفيه

    الأخضر :- ضغط البترول المطلوب - بار
    البنفسجي :- ضغط البترول الحقيقي - بار

    البرتقالي:- فتحة الثروتل بدي - نسبة % (100% مفتوح - 0% مغلق)

    الرصاصي :- الواسجيت - نسبة % (100% مغلق - 0% مفتوح)

    الأزرق: البوست المطلوب - psi
    الأحمر:- البوست الحقيقي - psi

    البرتقالي :- المس فاير (مصفر .. يعني ماشي مس فاير)


    الرسم البياني الأول

    البترول .. مثل ما تشووفون ضغط البترول لا يوصل للمطلوب أبداً .. وتقريبا في فراغ 10 بار أبتداءاً من 4400 لحد القير ما يبدل ..

    البوست .. الحمدالله 100% .. مافي أي لييك .. والمطلوب والحقيقي مع بعض تحت سيطرة الواسجيت (بابمبرز .. مسيطر عالوضع:D) .. تقدرون تشوفون الـنقزة اللي صارت فالبوست من 3800-4100 .. هذا يسمونه بوست spike .. الواسجيت عالج المشكله بأسرع وقت .. وتقدرون تشوفونه أنه فتح كان 85% مغلق ونزل لـ65% في حزة البوست spike

    المس فاير .. الحمدالله كله 0 .. هذا يعني الأنجكترات شغاله 100% .. وخصه الأنجكترات معدله وأول ما نزل الكت بالسوق .. كان في كلام أنهم يعطون مس فاير .. بس الحمدالله عندي تمام التمام ..


    الرسم البياني الثاني

    هو عبارة عن نسبه الهوا للبترول .. البنفسجي النسبه المطلوبه .. الأخضر النسبه الحقيقيه .. النسبه تعتبر غنيه بالبترول rich .. وتعتبر برمجه safe .. ومن فوايدها تنزل من حرارة القزوز والتوربو EGT..



    طرشت هالقرايات كلها للمهندس Mike .. وهو شغال بـAPR .. وهذا رده للموضوع ..





    مثل ما تقرون .. قالي أجيك على الـCam Lobe لبمب البترول .. ومثل ما تشوفون بالصورة اللي فووق .. الكام لوب بحالة جيدة جدا .. يعني B+ وفوق :D

    فأنقل أنتباهي للـRelease Valve .. وهو موجود على الفيول الريل .. وظيفته أنه يطلع الضغط الزايد الموجود في الفيول ريل .. و VW من نزلت هالمكينة على سياييرها .. هالـrelease valve كان في أكثر من إصدار منه .. فيه منه يفتح على 110 بار .. وفي 120 بار .. والموجود بالسيايير الأمريكيه من طاحت عندهم 130 بار ..

    فأن شاء الله هالصيف .. بيلس أركض ورى هالسالفه لين ما أحلها .. يبالها نفج الأنتيك مانفولد من أول يديد .. وتقدرون تشوفون مكان هالقطعه بهالصورة .. رقم 10







    الأختبار الثانيه .. واللي يهمني ألا وهو الـMaxSpeed .. وتبديلات القير بالنسبه للتوربو .. مشكلة الـDSG فيه قفله للتبديلات وخاصه بالقيور الـ 4 و5 .. ألا وهي أهم القيور للمقاوم .. وعلشان أطلع أقصى طاقه من التوربو أحتاج للآر بي أم 6500 وفوق .. وللأسف أكتشفت أنه القير يبدل على حدود الـ6250-6350 ..

    والرسم البياني يوضح هالشي .. أقدر افتح القفله اللي على القيور .. بأني أطرش كمبيوتر القير لشركة HPA .. ويسوولي أعادة برمجة كامله .. أختار فيها اللي اباه مثل الانج كنترول على أي أر بي أم .. أختار القير متى يبدل .. وأحلى شي .. يقصرون 60% من سرعة التبديلات ..

    الـDSG يبدل 0.2 من الثانيه .. 0.2 ضرب 60% = 0.12 من الثانيه .. :D







    الجولف فيها مشكله معروفه .. ألا وهي قيج السرعه كلش مب مضبوط .. فعلشان أطلع السرعة الحقيقة للسيارة .. كنت أسوي حركة بالمكيف تتطلعلي السرعه بالضبط .. ومثال .. على سرعة 251 بقيج المكيف .. القيج اللي بالطبلون يعطيني فوق الـ280 طموح وايد :D

    ومن بعد ما سجلت هالرسم البياني عن طريق الكمبيوتر أكتشفت أكتشافين لأول مره ..

    القيج اللي عن طريق المكيف ما يقرى أكثر عن 251 ..

    لو بقرى السرعة عن طريق الـvag-com والابتوب موصل بكمبيوتر السيارة .. القيج ما بيقرى أكثر عن 255 .. ودليل على هذا الرسم البياني فوق .. السرعه واقفه على 255 والأر بي أم يكمل لـ6624..

    يعني عندي سيارة كل القيجات اللي فيها فشل .. واحد مخرف .. وثنين ما بيقورن أعلى عن 251 و255 .. فما شي غير حل واحد .. الا وهو الـGPS خارجي .. وبتيكم العلوم في النتايج ..




    ---------------------




    النتائج

    عندي نتيجتين أبا أعرفهم .. قوة السيارة بعد التوربو .. والسرعة القصوى اللي أقدر أوصلها ..

    علشان أعرف قوة السيارة يبالي أسوي داينو .. وأهم شي تسوي داينو قبل التعديل وبعده .. علشان تعرف الفرقيه بالضبط .. المشكلة ركبت التوربو وما سويت داينو قبل .. طاااف ..

    فالإمارات مليون داينو .. وداينو عن داينو يفرق .. وما تقدر تقارن بين ثنين مثل العين بالعين .. فطرحت مناقصه على مستوى الدولة :D .. واللي فاز كراج Tam الموجود بالجرين كميونتي ..






    كراج تام يديد على دبي .. بس ونعم القراج .. سيايير حلبة دبي غالبيتها عنده .. وماشاء الله شغلهم جدا نظيف وعلى أصول ..

    حجزنا موعد مع الأخ محمد وهو أكثر واحد فاهم بسوالف الـVW .. عنده سيات ليون .. ويشاركنا عشق هالمكينة الـ2.0TFSI ..

    من تفتح الباب .. تدخل هالشو روم والرسبشن عالطرف .. والكراج اللي بكبره مكيف يبين من الباب ..





    زقرت هالـNSX .. على ما ذكر كان سوبر جارج ..









    بعض السيايير الموجودة .. وغيره ..

    بسنا دعايه .. نيي حق اللي ياين نسويه ..







    يالسين يربطونها عالداينو ..

    ألحين تتريون الفيديو صح .. للأسف ماشي .. بعد هالصورة .. نازعني وقالي أرجع الشو رووم وشوف من مناك .. :D







    الأنعكاس عالزجاج ما خلاني أكمل تصوير .. وسوويت طاااااااف ..


    أنزين بو الشباب ذبحتنا .. كم يابت ..

    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -
    -

    269.5 حصان .. أنزين كيف وليش .. يا عمي شو اللي صاير .. السيارة المفروض تييب بين الـ300 والـ350 حصان على الويل .. وهذا الداينوا اللي موزعتنه APR بموقعها ..





    382 حصان عالمكينه .. يعني ما بين الـ300-350 عالويل .. وين كل هالقوة سارت ؟؟

    نرجع ونشوف .. أول شي ما عندي Base Numbre أو الداينو قبل لا اركب التوربو .. فما أقدر أحكم كم القوة زادت .. ما أقدر أقارن وأبدي بالرقم اللي من VW .. الا وهو 200 حصان للجولف العاديه .. نزين حبيبي .. وين الباقي بعد الـ270 ..

    يوم سرت أسوي الداينو .. الأخ محمد واللي يعرف عن سوالف الـVW كان بإجازة .. واللي عملي الداينوا ما كانت عنده اي خلفيه عن سيايير الجولف وكم تييب على داينوهم ..

    تحرقصت لين ما قلت بس وأنا ابا أرمس محمد وأبا أعرف شو السالفه وليش الرقم واطي .. التركييب 100% والقرايات تأكد هالشي ..

    ليييييييييييين ما رمسنا محمد وعرفنا السالفه بالزبط .. ومن بعد هالتلفون .. جان أستانس .. :D


    الجولف من الوكاله جابت على الداينو مالهم .. 162 حصان على الويل

    قولفتي جابت 269.5 حصان على الويل

    وعلشان أعرف بالضبط لازم أحسب خسارة القوة من المكينه للويل .. ألا وهي تقريبا 15%

    162 ضرب 15% = 186.3 حصان
    269.5 ضرب 15% = 309.925 حصان :D


    ألحين علشان أعرف كم زيادة القوة من الستوك لبعد التوربو .. أطرح الرقمين وأطلع الفرق

    309.925 - 186.3 = 126.325 حصان لقيتهم بعد التوربو .. الحمدالله ..

    من الداينو اللي موزعتنه APR .. السيارة وكالة جابت 212 حصان تقريبا .. و382 حصان بعد التوربو .. نطلع الفرق = 170 حصان زيادة ..

    اللي قاصرني 170-126.325 = 43.675 حصان ..



    تقريبا 44 حصان .. أسال عمري وين ساروا .. أو فالأساس هل في قاصر ؟؟ .. نرجع ونشوف شو ممكن المشاكل اللي أثرت ..

    - المقارنه بين داينوين دووم مش مضبوطة .. وخصه أذا كانوا من ماركه مختلفه .. APR تستخدم الـDynaPack .. وكراج تام يستخدم الـDynoDynamics .. واحد صناعه أمريكيه والثاني صناعه أستراليا ..
    - القير .. الداينو صار على القير الـ4 .. ومثل ما شفتوا في حتمال أنه القير يبدل قبل لا تطلع كل القوة من المكينه .. ويزيد الطين بله .. الأر بي ام ما كانوا شابكينه يوم يسوون الداينو ..
    - مشكلة البترول .. البترول مب بالضغط المطلوب .. هل بيأثر على قوة السيارة ؟
    - مشكله الوصخ اللي بالهيد .. هالترسيبات حتمال كبير أنها تأثر على أداء السيارة ..
    - التوربو تركب والسيارة ماشيه 53 ألف ..
    - القزوز يصغر من 3 أنج للداون بايب .. لدبات الوكالة اللي هي 2.5 أنج .. وطبعا هذا كلش ما ينفع .. وخصه أذا مركب توربو أكبر .. يبالك أقل قدر من القيود أو الموانع ..



    المطلوب عمله وعلى حسب الأهميه :-

    - حل مشكلة البترول ومحاولة تنظيف الهيد بدون تبطيل .. ببعض المحاليل مثل الـVentil Sauber من LIQUI MOLY
    -قزوز جديد كامل 3 أنج
    -تطريش كمبيوتر القير لعمل برمجة ورفع القفله



    الحمدالله وله الشكر .. راضي بنسبة 90% عن الكت والنتايج .. وهذا أهم شي .. الراحة النفسية .. والله لو تسوقون السيارة ما تقولون معدله لين ما تدووس فيها .. حشره ماشي .. الكت ابد ما أثر على السيارة وعمليتها يوميا .. ألا خلاها أحلى .. تقريبا 85% من سواقه الشارع البوست مبند .. على عكس توربو الوكاله .. اللي كان يفتح من 1500 ويخور على الـ5000 .. النتيجه صرفيه أحسن للبترول تقريبا 30-50 كيلو زيادة ألحين أحصلهم يوم أعبي التانكي 50 .. وفوق هذا 126 حصان ببلاش .. الحياه حلوه :D

    تجربه حلوه وممتعه .. وتعلمت منها حيل .. وسمحلونا أذا تفلسفنا وايد .. :D .. وحاضرين لكل الأستفسارات ..


    ونختمها على هالصورة .. وما أقول غيير .. بالرااحه ;)






    أخوكم غــانــمـ


    www.goapr.com
    www.ross-tech.com
    HPA Motorsports Inc.
    VF-Engineering - Forced Induction Systems for Volkswagen, Audi, BMW and Porsche
    ATP TURBO - The Premiere Provider of Turbocharging Components
    Dynapack Chassis Dynamometers
    www.dyno.com.au

  4. #4
    تاريخ التسجيل
    May 2007
    الدولة
    23
    المشاركات
    5,600

    افتراضي

    السلام عليكم

    القولف ماشاء الله سياره ماعليها كلام وانتبه بعد ماشاء الله عليك فاهم لها وعرفت كيف ترتبها الله يبارك لك فيها

    ماشاء الله شغل جداً ممتاز وكت ماشاء الله احسه كامل ومب ناقصه شئ .

    بصراحه كبرت بعيني طلعت مب هين تشتغل بنفسك وتفك وتركب كل شئ ، الشئ الوحيد الي نعاني منه هو انك لازم تبطل واجهه الموتر كامله عساس تقدر تشتغل في المكينه وانته مرتاح لأن المحرك وضغيته على جمب والمكان ضيج .

    صوت الموتر مع التشغيل ماشاء الله خطير بس مادري كيف الصوت مع القزوز الحين ؟


    عندي سؤال بسيط هل غيرت مبرد زيت الجير ولا للحين على مال الوكال ؟ مراوح التبريد هل هي مالت الوكاله ولا بدلتهم ؟

  5. #5
    الصورة الرمزية EL_3grab
    EL_3grab غير متصل عضو فعّال جداً
    تاريخ التسجيل
    Jun 2006
    الدولة
    23
    المشاركات
    1,808

    افتراضي

    اقتباس المشاركة الأصلية كتبت بواسطة عاشق الالماني مشاهدة المشاركة
    السلام عليكم

    القولف ماشاء الله سياره ماعليها كلام وانتبه بعد ماشاء الله عليك فاهم لها وعرفت كيف ترتبها الله يبارك لك فيها

    ماشاء الله شغل جداً ممتاز وكت ماشاء الله احسه كامل ومب ناقصه شئ .

    بصراحه كبرت بعيني طلعت مب هين تشتغل بنفسك وتفك وتركب كل شئ ، الشئ الوحيد الي نعاني منه هو انك لازم تبطل واجهه الموتر كامله عساس تقدر تشتغل في المكينه وانته مرتاح لأن المحرك وضغيته على جمب والمكان ضيج .

    صوت الموتر مع التشغيل ماشاء الله خطير بس مادري كيف الصوت مع القزوز الحين ؟


    عندي سؤال بسيط هل غيرت مبرد زيت الجير ولا للحين على مال الوكال ؟ مراوح التبريد هل هي مالت الوكاله ولا بدلتهم ؟

    تسلم عزيزي

    نفس ما قلت يوم أفج الواجهه جد أريح للشغل ..بس مب شرط بعد .. فالكتيب ناصحينك متى تشتغل على هذا وعلى ذاك .. تستغل الفرصه دام أنه مبطل لشي تسويه .. أشتغل على شي ثاني .. قبل لا تخلص من الأول ..

    الصوت وكالة لين ما يشتغل التوربو .. وهذا اللي ستغربت منه .. أبد مافي حشره .. وله مزه حلوة .. طبعا بالكبينه تسمع مختلف الأصوات اللي تطلع من المكينه .. التوربو .. الهوى .. البلو أوف .. بس ماشي حشره قزوز في الكابينه أبد ..

    القير له تبريد مائي ومتصل بالراديتر .. وعندي قرايات درجة زيت القير يوم الضغط ..



    الأخضر حرارة آيل الكلتج والحمدالله ما ترتفع وايد

    الأحمر .. حرارة آيل كمبيوتر القير .. ترتفع من 87 لين 91 بس :)

    الآخذ بنصيحة HPA .. وهم أعلم الناس بقيور الـDSG .. كل اللي أحتاجه هو تبديل آيل القير في فترات أقل .. من كل 60 ألف للجولف العاديه .. لحد 20 ألف كيلو في حالتي .. وأبدل فلتر القير كل 10 ألاف كيلو ..

    ويوم بطلع فوق الـ400 حصان عالمكينة .. يبالي كلتجات يديدة تستحمل العزم الزايد .. وتبديل الآيل والفلتر كل 10 آلاف كيلو ..

    مرواح تبريد السيارة هيه نفسها .. وتكفي بالغرض وزيادة .. يوم تضغط بالسيارة وتبندها دايركت بدون ما تريحها .. المراوح تتم شغلها .. لين ما ترجع حرارة الماي طبيعية وعقب تغلق نفسها ..

  6. #6
    Bu_7maid غير متصل عضو فائق التميز
    تاريخ التسجيل
    Jun 2006
    الدولة
    الامارات-دبي
    المشاركات
    6,000

    افتراضي

    اقوى موضوع في المنتدى .. :D

    قريت الجزء الاول ..

    عندي كلاس الحين وبكمل في البيت .. عالشبرية .. :D

    لي عودة ..

صفحة 1 من 9 123456789 الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

راعي اعلامي لمعرض اكسس 2016

1 2 3 4 5 6 7 8 9 10 11 12 13 14