السلام عليكم جايز ...كيف الســــاع؟؟؟

- بعد دراسة ومراقبة سوق السيارات لاكثر من 6 سنوات لاحظنا ارتفاع خيالي لاسعار السيارات ....وحاليا كما علمت من مصادر داخل اكثر وكالة سيارات في الامارات ..ان هناك اتفاقا بينهم على رفع اسعار السيارات الجديدة ابتداء من منتصف العام لموديلات 2008 بنسب تترواح بين 10% الى 20% ..على سبيل المثال (تويوتا كامري يرتفع سعرها ويرتفع معاها سعر الهوندا اكورد والالتيما ..وهم من نفس الفئة)

واذا علمنا ان اسعار السيارات اليابانية تتأثر بسعر صرف الين الهابط والمرتفع الا ان الاسعار تتصاعد سنويا وكذلك الحال بالنسبة للسيارات الاوروبية ...

ولكن نأتي للسيارات الامريكية وكما نعرف ان الدرهم مرتبط بالدولار ..فإن ارتفاع سعر السيارات الامريكية بدون مبرر حيث وصلت اسعارها لتصبح مثل اسعار السيارات اليابانية ..

وعلى سبيل المثال (فورد اكسبلورر 2006 كانت تبدأ ب 97 الف وفي 2007 صارت تبدأ ب 106 الاف بدون اضافة او تغيير مسمار واحد فيها بارتفاع مقداره 10 % ) وهذا مجرد مثال واحد فقط والامثلة كثيرة نذكر منها اللومينا والكابرس اللتان لم تنتشران كما انتشر الجيل السابق فور نزوله .. والكثير من الناس بغير رأية في سيارة بسبب ارتفاع سعرها اكثر من مرة خلال سنه واحد وبعض الوكالات لها اسعار مختلفة كل 3 شهور ...

وللاسف وزارة الاقتصاد تراقب فقط اسعار تذاكر السينما وغيرها من الكماليات ولا تهتم بسلعة اساسية في حياة الناس الا وهي وسيلة النقل
ونصيحة اقولكم اللى يفكر يشتري سيارة بعد سنه..ياخذ مستعملة استعمال بسيط ..او يستورد له سيارة بضمان عالمي من امريكا اللى تتشابه المواصفات الخليجية معها من حيث تحمل درجه الحرارة العالية ...

اذكر في سنه 2000 الكامري كانت ب 59 الف فل اوشن 4 سلندر والحين الكورولا بها السعر ماتجي فل اوبشن ...والحين وصلت الكامري الى اقل من 100الف بقليل وسوف يرفع السهم فوق .. قصدي السعر فوق الا100 الف قريبا جدا

__________________


( قُلْ لَوْ كَانَ الْبَحْرُ مِدَادًا لِكَلِمَاتِ رَبِّي لَنَفِدَ الْبَحْرُ قَبْلَ أَنْ تَنْفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا )

__________________

هلا خوي جراند ..وانت الصادق ..الهوندا سي آر في ..صارت ب 102 الاف فل اوبشن ...
شر البليه ما يضحك ..سيارة 4 سلندر صارت بالقيمة .. وماركة لكزس واصلت الارتفاع الصاروخ مع المرسيدس ..وياليت الاسعار العالمية تزيد مثل زيادتنا ...وهم اسعارهم تضاف لها ضرائب وتطلع ارخص من عندنا ...

شركة دودج مثلا خفضت سعر الدودج دورانجو 2000 دولار بالتمام والكمال لموديل 2007 واللى صار ارخص من موديل 2006 ولكن ماذا حصل هنا ..؟؟؟؟!!! زاد سعر السيارة عن موديل 2006 بأكثر من 22 الف درهم !!!!!! ياعيني على النصب الاستغلال المكشوف

__________________


( قُلْ لَوْ كَانَ الْبَحْرُ مِدَادًا لِكَلِمَاتِ رَبِّي لَنَفِدَ الْبَحْرُ قَبْلَ أَنْ تَنْفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا )

جمرك السيارات عندنا من ارخص المناطق بالعالم 5% ولكن جشع الوكلاء هو السبب ... واذكر واحد من الشباب اشترى كاديلاك CTS 2005 بوقتها وكان يبداء سعرها بالوكاله من 120 الف الرجال كان عنده معرفه بالوكاله واخذها بالتسعينات لاحظ طاح 30 الف من السعر ... فالسؤال كم مكستب الوكيل اذا كان يخفض 30الف من سعر السيارة؟؟؟ ....ولاننسى سعر الC300 اول ما نزلت ب130 ثم ارتفع ووصل ل160 و الحين سعرها 140 .......
والمشكله الكبيره اذا كان فيه اكثر من وكيل لماركة واحد فتلاحظ قمة التناقض ......

واقرب مثال وكلاء هيونداي عندنا ((الشرقيه وكيلها المجدوعي والوسطى والمنطقة الشمالية وكيلها الوعلان والغربيه وكيلها الناغي)) الناغي نزل الشكل الجديد للكوبيه 2007 ((على حسب كلام واحد من أهل جدة ))اما الوعلان نزل الشكل القديم على انه 2007 ((امس اتصلت عليهم ابسأل هالنزل الشكل الجديد والا لا وقال لي احتمال ماتنزل الا 2008)) ....

ما أقول الا الله يصلح الحال ... واتمنى من وزارة التجارة والغرف التجارية انها تراقب اللي يصير

بالنسبه الى عام 2008 (الله يلحقنا وإياكم خير) فيعزى السبب إلى ارتفاع مادة الألمونيوم والتي تستعمل لصناعة أجزاء كثيرة من السياره

واللي لاحظته انا من خلال متابعتي لاسعار السيارات (في الرياض) كثير من السيارات نزلت أسعارها والسبب قلة المشترين.. يعني الحين الوكلاء لسان حالهم يقول (ان طاعك الزمن والا طيعه) واللي ساكن في الرياض يلاحظ كثرة العروض من أغلب الوكلاء والسبب ان ما عاد فيه ناس تشتري مثل أول لأسباب كثيره منها: اللي تعلقوا في الأسهم / وانشغال الناس بمصيبة ارتفاع المواد الاستهلاكيه وأسباب ثانيه لا تحظرني حاليا

الخلاصه/ نظام الوكلاء عندنا.. كل ما زاد الطلب زاد السعر ووزارة التجارة وحماية المستهلك ما حولك أحد
آسف على الإطالة

ياخوي احين ماشي غير انا نشتري من امريكا

اسعارهم ارخص + مواصفات اكثر

ولاجشع هالوكلاء

مشكورين شباب على مداخلاتكم وآرأكم في الموضوع ...الوكلاء في الامارات لما يشوفون الطلب على السيارة مرتفع يزيدون السعر بشكل جنوني ولما يشوفون الطلب قليل جدا يثبتون السعر ولاينزلونه الا عند قرب انتهاء السنه ...
ووجود اكثر من وكيل يفيد السوق لان الاحتكار يزيد من جشع الوكلاء ...انا عن نفسي احتمال كبير اشتري سيارة من امريكا ومستعملة لان الاسعار هنا وصلت الى مستويات لايمكن القبول بها ..
وشفنا كيف الوكلاء كل سنه يزيد سعر السيارة بين 5 الاف الى 10الاف درهم سنويا على سعر السيارة حتى واذا لم يتغير فيها مسمار واحد ...
وما يزيد الطين بله هو انخفاض القيمة الشرائية للدرهم والعملة الخليجية بسبب الغلاء في كل شي ..فالشخص يحسب له الف حساب لما يشتري سيارة جديدة ..

__________________


( قُلْ لَوْ كَانَ الْبَحْرُ مِدَادًا لِكَلِمَاتِ رَبِّي لَنَفِدَ الْبَحْرُ قَبْلَ أَنْ تَنْفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا )

ما أدري شو أضيف بس اللي عندي الحينه هو

( جشع الوكلاء )